紅軍半場勝獵海鷗

2019/12/2 20:21:18

沙拿復出前線齊腳
周六晚英超列强分途出擊,其中「1哥」利物浦主場恭候「海鷗」白禮頓。自埃及前鋒穆罕默德沙拿傷愈復出之後,前場三叉戟已經齊章,前場攻力重回巔峰,加上「紅軍」今季聯賽坐鎮晏菲路踢法搶韁,面對作客表現一般嘅白禮頓,「紅軍」有力於開局先下手為强,半場主勝唔好錯過。

(Now 621周六晚上11時直播)

利物浦啱啱周中歐聯雖僅以1比1逼和拿玻里,但好消息係王牌穆罕默德沙拿已傷愈復出並踢足全場,令鋒線回復完整。沙拿嘅好拍檔沙迪奧文尼過去3場聯賽都有波入,暫時以8個聯賽入球成為「紅軍」頭號射手,至於羅拔圖法明奴更於上場聯賽攻入致勝球,「紅軍」今季之所以喺聯賽高歌猛進至今保持不敗,幾位進攻好手絕對要佔一大功勞。查實利記一向主場威力強勁,今季6次聯賽主場出擊贏晒之餘,其中5場於上半場已取得領先優勢,搶攻踢法夠煞食。

白禮頓作客曳遇強冇計
近年富有耐性、肯畀領隊時間同空間嘅英超球會管理層真係買少見少,當中「海鷗」就係少數之一,佢哋啱啱就同將傳控踢法注入球隊嘅主帥樸達續約2年,擺明力挺呢位44歲少帥。可惜正處魔鬼賽程嘅白禮頓,早前先後輸畀曼城同李斯特城兩支前列分子,可見面對勁敵冇乜計,而且「海鷗」近5仗聯賽作客只得1和4負,呢場造訪晏菲路球場隨時由頭輸到落尾,捧半場主勝好過。