英超曼城搶分衝冠半場打爆般尼_東方日報

今晚英超強弱懸殊之戰，曼城主場砌般尼。「藍月亮」各項賽事近10仗取得9勝1和，為盡快重登榜首勢必全力以赴，加上主帥哥迪奧拿對「徒弟」般尼領隊高柏尼嘅能力瞭若指掌，睇番兩隊近9次對賽，曼城全勝之餘，全部半場領先，熱捧半場主勝。■（Now 623周四凌晨3時30分直播）

曼城近兩個月即使缺少養傷嘅艾寧夏蘭特，並冇影響成績，而且愈戰愈勇，上場英足盃更打破宿命，6次造訪熱刺新主場，首次贏波而回。祖利安艾華利斯、菲爾科頓及貝拿度施華等中前場球員都有數胡能力，加上「大腦」奇雲迪布尼復出後，球隊組織攻勢能力大增，料可迅速攻破般尼防線。

高柏尼教波有前冇後
般尼主帥高柏尼球員時代曾於2008至2019年效力曼城，佢教波風格亦跟隨哥帥，崇尚傳控進攻踢法。不過以般尼球員嘅級數，喺英超踢進攻足球猶如自投羅網，往往前面入埋唔夠後面輸，今季21場聯賽已經狂失42球。睇番般尼喺高柏尼執教下，兩鬥曼城分別大敗0比6及0比3，可見「徒弟仔」完全被師傅食住，今仗插翅難飛。