英超利物浦主場搶韁半勝收禮_東方日報

今晚英超「紅白大戰」，利物浦再鬥白禮頓。兩隊剛於英聯盃16強碰頭，同樣留力下「紅軍」險勝3比2晉級，今晚再遇必打真軍，預計利物浦仍然會佔上風，佢哋近5場聯賽主場，4次半場領先對手，面對重攻輕守嘅白禮頓有望添食，半場主勝抵玩。（Now 621周六晚11時直播）

白禮頓鬥攻易露空位
利物浦上輪聯賽同阿仙奴激和2比2，8連勝走勢斷纜，更被曼城搶走榜首位置，主帥施洛話現階段重視球隊表現多於聯賽排名，講係咁講，但畀人搶咗1哥位，條氣點都唔順，而且「紅軍」球員鬥心旺盛，晏菲路出擊更加如狼似虎。

當阿仙奴同曼城爆發傷兵潮之際，利物浦陣容相對較完整，暫時得門將艾利臣比加同前鋒迪亞高祖達兩位主力缺陣，前線大把數胡人物，預計英聯盃對白禮頓「起孖」嘅加普會退居後備，穆罕默德沙拿、達雲紐尼斯同路易斯迪亞斯合作攻堅，有望盡早開紀錄。

白禮頓踢法進取，經常同強隊合演入球騷，就算作客亦會同利物浦鬥攻，但後防暴露空位更易被打爆，睇好主隊搶得先機。