不來梅半場和啱數

2020/5/18 21:03:35

出勤王停賽谷唔起
德甲重開壓軸戰由雲達不來梅今晚主場迎戰利華古遜。雲達不來梅需要搶分護級,不過球隊「出勤王」、荷蘭中場卡拉臣累積5面黃牌要停賽,令本身攻力薄弱嘅中場線雪上加霜,今仗相信會先守住,利華古遜雖然要搶分爭入歐聯,但佢哋踢法穩中求勝,停擺前6場作客5場同對手打和,再追半場和啱數。(Now 671、有線652及612台周二凌晨2時30分直播)

現時排尾二嘅雲達不來梅,少踢2場之下落後尾3嘅杜塞爾多夫5分,要起碼取得附加賽資格甚或護級成功仍然未絕望。不過,不來梅今季攻擊力真係差到嚇死人,24戰只入27球,與杜塞爾多夫同屬德甲入波最少球隊,失球數字55球則「獨佔」榜尾,絕對係「攻不銳、守不穩」。

本來經歷停擺,可以畀不來梅抖抖氣,然後重新上路,可惜球隊「出勤王」卡拉臣喺停擺前喺德國盃攞黃牌,呢名今季24場聯賽全部正選上陣嘅荷蘭中場,累積5面黃牌要停賽,加上瑞典國腳左閘奧古斯天臣拉傷肌肉缺陣,對球隊影響甚大,估計佢哋今場只會以守代攻搶分。

利華習慣穩中求勝
利華古遜現時排聯賽第5,少踢1場之下只同第4嘅RB萊比錫相差4分,歐聯入場券觸手可及,實力無疑比雲達不來梅勝一籌,不過隊中神射手禾蘭受傷未能上陣,今場會用夏維斯、艾拿利奧及穆沙戴亞比攻堅,加上利華古遜近期聯賽作客稍為穩陣,停擺前6場作客有5場開半場和,相信經過一段休息期,球員們仍然要適應比賽節奏,即使面對弱旅,比賽初段未必採取主攻,今場捧半場和。

上一条:德甲攻略法兰克福VS门兴格拉德巴赫 下一条:没有资料