蔚山撻着恰水原

2020/5/21 19:34:46

上季金銀靴決鬥
今日韓職頭場由水原藍翼主場對蔚山現代。呢場焦點係上季金銀靴得主阿當泰加特、祖利亞尼加奧正面交鋒。不過以波論波,蔚山首仗大勝盡顯爭標霸氣,客勝追捧。(無綫85台周日下午3時30分直播)

賽前韓媒都聚焦喺呢兩名神鋒身上,視之為勝負關鍵之一。論近況,銀靴得主祖利亞尼加奧喺揭幕戰為蔚山現代省入兩粒,比起沉寂嘅金靴阿當泰加特搶鏡得多。翻查上季統計,祖利亞尼加奧雖然屈居射手榜次席,實際只係僅輸1球,而且助攻次數多阿當泰加特4次,綜合能力更勝對方一籌。

祖利亞綜合能力佔優
何況蔚山今季請到去過英超搵食嘅李青龍助陣,加上尹比加林、金仁成表現亦好活躍,可見現代已經上晒力。反觀,水原藍翼開鑼戰不敵全北汽車,澳洲中場安東尼斯仲攞紅牌,今場需要停賽,戰鬥力再受削弱。

而且睇埋往績,兩支球隊近5次交手,蔚山現代法定時間內取得4勝1和的壓倒性優勢,其中去年聯賽蔚山「三殺」水原過程中,祖利亞尼加奧個人射入2球,阿當泰加特就得1球斬獲,兩人高下立見,蔚山客勝有買趁早。

上一条:曼联力压皇马大巴黎领先1亿欧中场天王争夺战 下一条:没有资料