世冠盃季軍戰冇包袱捧大啱數

2021/2/11 20:36:50
今晚世冠盃頭場季軍戰由非洲代表艾阿里鬥南美洲代表彭美拉斯,無論任何大賽,季軍戰畀人感覺都係多入波,最大原因當然係冇心理包袱,可以大踢開放足球,世冠盃亦唔例外,過去5屆季軍戰總入球全開3球或以上,今場簡單捧2.5球大。(有線661及601台周四晚11時直播)

彭美拉斯要挽回面子
南美洲代表近年喺世冠盃表現麻麻,對上10屆有4支南美洲球隊未能進身決賽,不過呢4支球隊喺季軍戰法定時間攞到3勝1和,總入球全開3球或以上,全部都能奪得季軍「安慰獎」;彭美拉斯上場輸畀堤格雷斯,令後者成為首支進身決賽嘅中北美洲代表,咩面都冇晒,今場更要踢爭氣波。

艾阿里上場淨吞班霸拜仁慕尼黑兩蛋,全場捱打明顯技不如人,今場對住實力較接近嘅彭美拉斯,相信球員會落力表現自己。今屆係世冠盃改制後第4次有非洲球隊亮相季軍戰,對上3次法定時間總共出現咗9個入波,2次開3球或以上,預計今場亦會上演入球騷,大盤屬好路之選。
上一条:卢卡库破门阿什拉夫双响,国际米兰31博洛尼亚升至第二 下一条:没有资料