祖記搶W大展鴻圖

2021/2/17 17:22:05
經驗實力贏成條街
今晚續演歐聯16強首回合大戰,當中波圖主場迎戰祖雲達斯。葡超球隊波圖過去5屆參戰歐聯,只係試過一次打入8強;意甲勁旅祖雲達斯無論經驗及實力都喺對手之上,加上近3次歐聯對波圖全勝,有力反客為主,客勝值博。

(myTV Gold 303、Now 643、有線656及616周四凌晨4時直播)

波圖自從2003/04年球季由摩連奴領軍奪得歐聯冠軍後,表現無以為繼,近年只屬陪跑分子,上屆更於外圍賽出局。搞成咁皆因波圖每逢有球員打出名堂,就會被賣去各大豪門賺錢,難以建立出一套同列強爭霸嘅陣容,所以遇上其他歐洲豪門,往往毫無招架之力,例如前屆8強對英超利物浦,波圖兩回合合計就慘敗1比6出局。

C朗充滿爭勝決心
近年喺意甲橫行嘅祖記,一直視歐聯為頭號目標,2015及2017年兩次殺入決賽,同樣功敗垂成。佢哋歐聯經驗豐富,特別係巨星C朗拿度職業生涯曾為曼聯及皇馬5奪歐聯冠軍,堪稱「歐聯王者」,呢位葡萄牙球星當年選擇轉投祖記,正正希望幫球隊一嘗歐聯冠軍滋味,爭勝心唔使懷疑。祖記賽前收到好消息,箭頭保羅戴巴拿已告傷愈並投入操練,雖然今仗未必趕及復出,但次回合可望披甲,對球隊士氣甚有幫助。加上祖記上場意甲作客拿玻里以0比1告負,谷埋一肚氣,作客必搵波圖祭旗。

雙方對上一次歐聯交鋒係2016/17年16強階段,當時祖雲達斯兩回合分別作客贏2比0及主場贏1比0,可說完全食住波圖,加上「斑馬兵團」今屆歐聯分組賽作客3連勝,合共攻入9球,客W有捧場價值。
上一条:歐聯重心C朗大展鴻「圖」祖記上盤去馬 下一条:没有资料