李城未回氣讓唔起斯拉維亞

2021/2/18 12:08:43
歐霸盃32強首回合,布拉格斯拉維亞主場迎戰李斯特城(圖),捷克球隊布拉格斯拉維亞今屆賽事表現令人驚喜,分組賽3場主場更加全勝,包括擊敗德甲勁旅利華古遜。李斯特城上場英超惡鬥完利物浦,可能回唔切氣,讓波有暗湧,寧願博布拉格斯拉維亞讓球主勝。(Now 644、有線603台周五凌晨1時55分直播)

布拉格斯拉維亞本身有得踢歐聯附加賽,可惜輸波要「降呢」轉戰歐霸盃。然而,呢支捷克老牌球隊喺歐霸盃表現並唔比主流聯賽球隊遜色,6場分組賽取得4勝2負,其中3場主場全勝,包括以1比0擊敗利華古遜,以3比2力挫法甲球隊尼斯,所以即使今場對手係英超勁旅李斯特城,相信斯拉維亞都唔會太輸蝕。

羅渣士踢歐霸例玩輪換
另一邊廂,無可否認李斯特城整體人腳較佳,但佢哋首要目標都係爭奪英超錦標,歐霸盃只屬次要。事實上,「狐狸」領隊羅渣士喺今屆歐霸盃,往往會輪換陣容,首席射手占美華迪只曾兩次上陣,其中1次仲係後備入替。更何況呢位34歲老將剛傷愈不久,加上今場係首回合,羅渣士可能收起佢,等次回合返主場再搏殺都唔奇。睇番李斯特城近2場歐霸作客都贏唔到,今場仲要讓波,寧願捧布拉格斯拉維亞讓球主勝。
上一条:0400 歐霸 特拉維夫馬卡比薩克達 下一条:没有资料