賓菲加阿仙奴互轟博大霧

2021/2/18 12:08:46
今晚歐霸32強首回合,阿仙奴於中立場意大利嘅羅馬火併賓菲加。阿仙奴今屆歐霸6戰全勝兼火力全開,依家仲加入新核心馬田奧迪加特,攻力進一步提升,不過賓菲加亦非善男信女,碧斯於歐霸更頻有士哥,鬥攻格局必捧入球大。(myTV Gold 303、Now 643、有線656及616台周五凌晨4時直播)

奧迪加特來投生猛晒
阿仙奴於歐霸B組分組賽多用副選同小將擔大旗,效果奇佳,6戰贏晒狂轟20粒,全開3球或以上,伊美路維同柏保路馬尼藉住歐霸嘅出色表現,依家仲「升呢」喺聯賽獲重用,一度被標籤為「水貨」嘅尼高拉斯比比,喺今屆歐霸已入3粒及有3次助攻,絕對係畀邊緣人博上位嘅最佳場合。當然嚟到淘汰賽,主帥阿迪達未必再大膽用小將,不過冬窗從皇馬借入嘅天才中場馬田奧迪加特,上仗拍住伊美路維同布卡約沙卡,成功激活進攻,協助隊長奧巴美揚戴帽以4比2擊敗列斯聯,唔好忘記仲有拿卡錫迪同加比爾馬天尼利,令阿迪達中前場大把人揀,考慮到下仗聯賽要硬撼曼城,今仗或者收起奧巴美揚,但進攻影響不大。

另一邊廂,賓菲加近6仗聯賽僅1勝,於葡超已跌落第4位,更想喺歐霸盃發圍,佢哋喺D組分組賽6戰取得3勝3和,比格拉斯哥流浪少2分以次名出線,呢班波進攻大過天,呢6場狂轟18粒,全開3球或以上,火力僅次於利華古遜同阿仙奴。其中最搶鏡嘅梗係碧斯,呢位進攻中場於今屆歐霸已有6球進帳,與里爾嘅耶斯斯並列射手榜榜首,腳風奇順,而且今仗係「掛名」主場,必定搏盡搶先機,既然大家都咁攻得,捧大盤最上算。
上一条:0400 歐霸 莫迪賀芬咸 下一条:没有资料