[太阳拆局]开咧在即唔想添伤兵红军锡身半场易和

今晚有场重量级球会热身赛，德甲「狂牛」rb莱比锡主场硬撼英超利物浦。「红军」近期伤兵满营，已经令主帅高普好头痛，而且临近开咧亦唔会太搏，避免再添「十字兵」；莱比锡向来硬净见称，双方初段随时陷于胶着，半场和波机会甚高。
（周五凌晨1时15分开赛）
利物浦季前热身赛表现唔算突出，先喺泰国上演嘅「双红会」净吞曼联4蛋，之后于新加坡虽以2比0击败另一英超球队水晶宫，不过此役有「玻璃脚」阿历士张伯伦负伤离场，睇嚟有排抖。祸不单行嘅系，门将艾利臣比加喺练习时受伤，赛后高普话呢位巴西门神会赶及出战月尾小区盾对曼城，即系今仗唔使预佢，更令人担忧嘅系前锋迪亚高祖达疑似旧患复发，可能季初都未出得，令高普大失预算。
达云纽尼斯尚待融入
利物浦今夏成功同王牌穆罕默德沙拿续约，不过多年拍档沙迪奥文尼已离队转投拜仁，尽管以破球队转会费纪录喺宾菲加签入达云纽尼斯，但佢近两仗唔系空门炒高就门前踢空气，初来报到备受批评，难免影响信心，亦意味锋线仲需要时间磨合。
rb莱比锡属于「红牛系」球队，而红牛系一向都系「红军供货商」，近年来投嘅沙迪奥文尼、拿比基达、南野拓实及伊巴希马干拿迪等，之前都效力过萨尔斯堡或者rb莱比锡，呢支德甲兵对利物浦都颇为了解。莱比锡日前同另一英超球队修咸顿「拍跳」，结果以3比1获胜，状态相当唔错。睇番双方近两次交手，利物浦同样赢2比0，咁啱两仗上半场都系互交白卷，加上佢哋为免开咧前再添伤兵，今仗绝对有理由就住嚟踢，睇怕半场咬唔入对方。